Enwi, chychwyn a cyhmhwyso

1.–(1) Enw'r Gorchymyn hwn yw Gorchymyn Cŵn Gleision (Gwahardd eu Pysgota) (Cymru) 2008 a daw i rym ar 1 Gorffennaf 2008.

(2) Yn ddarostyngedig i ddarpariaethau'r erthygl hon, mae'r Gorchymyn hwn yn gymwys o ran Cymru.

(3) Nid yw'r Gorchymyn hwn yn gymwys i lestri pysgota–

(a) o fewn ystyr Erthygl 3(c) o Reoliad y Cyngor (EC) 2371/2002 ar gadwraeth a defnydd cynaliadwy o adnoddau pysgodfeydd o dan y Polisi Pysgodfeydd Cyffredin(3), sydd wedi eu cofrestru mewn Aelod-wladwriaeth arall; neu

(b) sydd wedi eu cofrestru mewn trydedd wlad.

Dehongli

2. Yn y Gorchymyn hwn–

ystyr "ci glas" ("tope") yw'r rhywogaeth Galeorhinus galeus; ac

mae i "Cymru" yw'r ystyr a roddir i "Wales" gan adran 158(1) o Ddeddf Llywodraeth Cymru 2006(4).

Gwahardd pysgota

3.–(1) Gwaherddir pysgota am gŵn gleision (heblaw â gwialen a lein).

(2) Os cymerir cŵn gleision ar fwrdd cwch, caniateir eu cadw ar yr amod nad yw cyfanswm y pwysau byw dros 45 cilogram mewn diwrnod.

(3) Ym mharagraff (2), ystyr "pwysau byw" yw pwysau carcasau cŵn gleision wedi eu diberfeddu wedi eu lluosogi â ffactor o 1.125.

Gwahardd trawslwytho

4. Gwaherddir trawslwytho cŵn gleision.

Gwaherddir glanio

5. Ni chaiff unrhyw berson lanio yng Nghymru –

(a) cŵn gleision a ddaliwyd â gwialen a lein, neu

(b) cŵn gleision y torrwyd eu pennau.

Pwerau swyddogion pysgodfeydd môr Prydeinig

6.–(1) At ddibenion gorfodi'r Gorchymyn hwn, caiff swyddog arfer y pwerau a ganlyn.

(2) Caiff swyddog fynd ar fwrdd cwch pysgota, gyda neu heb bersonau a bennwyd i gynorthwyo'r swyddog i arfer ei ddyletswyddau, ac at y diben hwnnw caiff ei gwneud yn ofynnol i'r cwch aros a gwneud unrhyw beth arall a fydd yn hwyluso mynd ar fwrdd y cwch.

(3) Caiff swyddog ei gwneud yn ofynnol bod meistr a phersonau eraill sydd ar fwrdd y cwch yn bresennol a chaiff wneud unrhyw archwiliad neu ymchwiliad y mae'n ymddangos i'r swyddog ei bod yn angenrheidiol ei wneud at ddiben gorfodi'r Gorchymyn hwn ac, yn enwedig–

(a) caiff archwilio unrhyw bysgodyn ar y cwch a chyfarpar y cwch, gan gynnwys yr offer pysgota, a'i gwneud yn ofynnol i bersonau ar fwrdd y cwch wneud unrhyw beth y mae'n ymddangos i'r swyddog ei bod yn angenrheidiol ei wneud i hwyluso'r archwiliad;

(b) caiff ei gwneud yn ofynnol i unrhyw berson ar fwrdd y cwch ddangos unrhyw ddogfen sy'n ymwneud â'r cwch, â'i waith pysgota neu â gwaith cysylltiedig neu â phersonau ar fwrdd y cwch, sydd yng ngafael neu ym meddiant y person hwnnw a chaiff gymryd copïau o'r cyfryw ddogfen;

(c) at ddibenion cael gwybod a yw'r meistr, perchennog neu siartrwr y cwch wedi cyflawni tramgwydd o dan adran 5 neu 6 o Ddeddf Pysgod Môr (Cadwraeth) 1967 fel y'i darllenir gyda'r Gorchymyn hwn, caiff chwilio'r cwch am y cyfrwy ddogfen a chaiff ei gwneud yn ofynnol i unrhyw berson ar fwrdd y cwch wneud unrhyw beth y mae'n ymddangos i'r swyddog ei bod yn angenrheidiol ei wneud at hwyluso'r chwiliad; ac

(ch) pan fo'r cwch yn un mewn perthynas ag ef y mae gan y swyddog reswm i amau bod y cyfryw dramgwydd wedi ei gyflawni, caiff, yn ddarostyngedig i baragraff (4), ymafael yn y cyfryw ddogfen a ddangoswyd i'r swyddog neu a gafwyd ar fwrdd y cwch a'i chadw'n gaeth at ddibenion galluogi i'r ddogfen gael ei defnyddio yn dystiolaeth mewn achos ar gyfer y tramgwydd.

(4) Nid oes dim ym mharagraff (3)(ch) yn galluogi'r swyddog i ymafael yn unrhyw ddogfen y mae'n ofynnol ei chario ar fwrdd y cwch a'i chadw'n gaeth ac eithrio tra bo'r cwch yn cael ei gadw'n gaeth mewn porthladd.

(5) Pan ymddangoso i swyddog fod unrhyw ddarpariaeth yn y Gorchymyn hwn wedi ei thorri ar unrhyw adeg, caiff y swyddog–

(a) cymryd, neu ei gwneud yn ofynnol i'r meistr gymryd, y cwch a'i griw i'r porthladd y mae'n ymddangos i'r swyddog mai ef yw'r porthladd cyfleus agosaf; a

(b) cadw'r cwch yn gaeth yn y porthladd, neu ei gwneud yn ofynnol i'r meistr ei gadw'n gaeth yno.

(6) Rhaid i swyddog sy'n cadw cwch yn gaeth neu'n ei gwneud yn ofynnol i gwch gael ei gadw'n gaeth gyflwyno i'r meistr hysbysiad ysgrifenedig yn datgan y cedwir y cwch yn gaeth neu y mae'n ofynnol cadw'r cwch yn gaeth hyd nes y tynnir yr hysbysiad yn ôl drwy gyflwyno i'r meistr hysbysiad ysgrifenedig arall a lofnodwyd gan swyddog.

(7) Yn yr erthygl hon, ystyr "swyddog" yw swyddog pysgodfeydd môr Prydeinig.

Nodyn Esboniadol

(Nid yw'r nodyn hwn yn rhan o'r Gorchymyn)

Mae erthygl 3 o'r Gorchymyn hwn yn gwahardd pysgota am gŵn gleision drwy ddefnyddio unrhyw ddull heblaw gwialen a lein. Caniateir cadw uchafswm o hyd at 45 cilogram mewn pwysau byw o gŵn gleision ar fwrdd cwch mewn diwrnod.

Mae erthygl 4 yn gwahardd trawslwytho cŵn gleision.

Mae erthygl 5 yn gwahardd glanio yng Nghymru gwn gleision a ddaliwyd â gwialen a lein neu gwn gleision y torrwyd eu pennau.

Mae erthygl 6 yn gosod pwerau swyddogion pysgodfeydd môr Prydeinig o ran y Gorchymyn hwn, yn ychwanegol at eu pwerau o dan Ddeddf Pysgod Môr (Cadwraeth) 1967. Rhagnodir sancsiynau troseddol gan adrannau 5(1), 5(7), 6(5), 6(5A) ac 11 o'r Ddeddf honno.

Mae asesiad effaith rheoleiddiol llawn o'r effaith a gaiff yr offeryn hwn ar gael oddi wrth y Gangen Polisi Pysgodfeydd, Llawr 1, Llywodraeth Cynulliad Cymru, Parc Cathays, Caerdydd, CF10 3NQ.