Enwi a chychwyn

1.–(1) Enw'r Gorchymyn hwn yw Gorchymyn Bro Morgannwg (Cymunedau) 2010.

(2) Yn ddarostyngedig i baragraff (3) neu i unrhyw ddiben a osodir yn rheoliad 4(1) o'r Rheoliadau, daw'r Gorchymyn hwn yn weithredol ar 1 Mehefin 2010.

(3) Daw erthygl 6 i rym–

(a) at ddibenion gweithrediadau rhagarweiniol i unrhyw etholiad sydd i'w gynnal neu sy'n ymwneud ag unrhyw etholiad sydd i'w gynnal ar ddiwrnod arferol ethol cynghorwyr yn 2012, ar 15 Hydref 2011;

(b) at bob diben arall, ar ddiwrnod arferol ethol cynghorwyr yn 2012.

(4) At bob diben arall, daw'r Gorchymyn hwn i rym ar 1 Rhagfyr 2010, sef y diwrnod penodedig at ddibenion y Rheoliadau.

Dehongli

2. Yn y Gorchymyn hwn–

• ystyr Map A ("Map A"), Map B ("Map B"), Map C ("Map C") a Map D ("Map D") yn eu tro yw'r mapiau sydd wedi'u marcio A, B, C a D o Orchymyn Bro Morgannwg (Cymunedau) 2010 ac sydd wedi'u hadneuo yn unol â rheoliad 5 o'r Rheoliadau;

• ystyr "y Rheoliadau" ("the Regulations") yw Rheoliadau Newid Ardaloedd Llywodraeth Leol 1976(3); ac

os dangosir bod ffin ar fap yn rhedeg ar hyd ffordd, llinell reilffordd, troetffordd, cwrs dŵr neu nodwedd ddaearyddol debyg, mae i'w thrin fel un sy'n rhedeg ar hyd llinell ganol y nodwedd.

Newid ardaloedd llywodraeth leol

3. Gwneir newidiadau i'r ardal llywodraeth leol ym Mwrdeistref Sirol Bro Morgannwg yn unol â'r darpariaethau a ganlyn yn y Gorchymyn hwn.

Llandochau a Llanfihangel-y-pwll - newid mewn ardaloedd cymunedol a newidiadau canlyniadol i drefniadau etholiadol

4. Mae'r rhan o gymuned Llandochau a ddangosir â chroeslinellau ar Fap A–

(a) yn cael ei throsglwyddo i gymuned Llanfihangel-y-pwll;

(b) yn ffurfio rhan o ward Llanfihangel-y-pwll yng nghymuned Llanfihangel-y-pwll; ac

(c) yn ffurfio rhan o adran etholiadol Dinas Powys.

Llan-maes a Llanilltud Fawr - newid mewn ardaloedd cymunedol a newidiadau canlyniadol i drefniadau etholiadol

5. Mae'r rhan o gymuned Llanilltud Fawr a ddangosir â chroeslinellau ar Fap B yn cael ei throsglwyddo i gymuned Llan-maes.

6. Yng nghymuned Llanilltud Fawr–

(a) nifer y cynghorwyr sydd i'w hethol dros ward Trebefered yw 4;

(b) mae nifer y cynghorwyr sydd i'w hethol dros ward y Gogledd yn parhau yn 5;

(c) nifer y cynghorwyr sydd i'w hethol ar gyfer ward y De-ddwyrain yw 3;

(ch) nifer y cynghorwyr sydd i'w hethol dros ward y Gorllewin yw 2.

Penarth a Sili - newidiadau mewn ardaloedd cymunedol a newidiadau canlyniadol i drefniadau etholiadol

7.–(1) Mae'r rhannau o gymuned Sili a ddangosir fel ardaloedd croeslinellog "a" a "b" ar Fap C–

(a) yn cael eu trosglwyddo i gymuned Penarth;

(b) yn ffurfio rhan o ward Plymouth yng nghymuned Penarth; ac

(c) yn ffurfio rhan o adran etholiadol Plymouth.

(2) Mae'r rhan o gymuned Penarth a ddangosir fel ardal groeslinellog "c" ar Fap C–

(a) yn cael ei throsglwyddo i gymuned Sili; a

(b) yn ffurfio rhan o adran etholiadol Sili.

Pendeulwyn a Llanddunwyd – newidiadau mewn ardaloedd cymunedol

8. Mae'r rhan o gymuned Llanddunwyd a ddangosir â chroeslinellau ar Fap D yn cael ei throsglwyddo i gymuned Pendeulwyn.

Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn, a wneir yn unol ag adran 58(2) o Ddeddf Llywodraeth Leol 1972, yn rhoi eu heffaith i gynigion gan y Comisiwn Ffiniau Llywodraeth Leol i Gymru ("y Comisiwn") a adroddodd ym mis Medi 2009 ar ei adolygiad o'r ffiniau sirol ym Mwrdeistref Sirol Bro Morgannwg. Argymhellodd adroddiad y Comisiwn newid i'r ffiniau rhwng cymunedau Llandochau a Llanfihangel-y-pwll, Llan-maes a Llanilltud Fawr, Penarth a Sili a Phendeulwyn a Llanddunwyd ac i nifer y cynghorwyr cymuned a etholir ar gyfer wardiau yng nghymuned Llanilltud Fawr. Mae'r Gorchymyn hwn yn rhoi eu heffaith i argymhellion y Comisiwn heb eu haddasu.

Mae printiau o'r mapiau sy'n dangos y ffiniau wedi'u hadneuo a gellir eu gweld yn ystod oriau swyddfa arferol yn swyddfeydd Cyngor Bwrdeistref Sirol Bro Morgannwg, Y Swyddfeydd Dinesig, Holton Road, Y Barri CF63 4RU ac yn swyddfeydd Llywodraeth Cynulliad Cymru, Parc Cathays, Caerdydd (yr Is-adran Polisi Llywodraeth Leol) CF10 3NQ.

Mae Rheoliadau Newid Ardaloedd Llywodraeth Leol 1976 (O.S. 1976/246) y cyfeirir atynt yn erthyglau 1 a 2 o'r Gorchymyn hwn yn cynnwys darpariaethau cysylltiedig, canlyniadol, trosiannol ac atodol ynglŷn ag effaith a gweithredu gorchmynion megis y rhain.